澳門司儀網

呢半年嚟新人被疫情搞到擺唔成酒，心情都好忐忑，其實以往都有新人遇到突發事，一樣令佢哋咁忐忑～有時仲會都嚟得好急，好似連比你諗下點應對嘅機會都無，只能夠講聽天由命。

 

今日凌晨掛咗9號風球，唔知原本有幾多新人會琴日或今日擺酒呢？（雖然農歷七月會極少）唔好彩遇正打風嘅話，一朝早，各人可能交通問題而遲到，計而影響出門時間、兄弟啲服裝又濕晒、花車到時又唔似花車、戶外又無得影相⋯呀～都仲係講緊朝早，真係頭都痛埋⋯

今日新聞講到同當年山竹比咁⋯2018年9月15日當日有場婚宴我要做，個風嚟之前已經講緊個風好勁，預計最近香港時間，亦係婚宴日子。前一兩晚，大家做咗最壞打算，朝早只會喺室內做儀式，夜晚就預咗有（大）部分親友唔嚟，即使入坐率唔夠，都唔會等，因為是次晚宴重點策略就係「快」！

 

當晚五時恭候前，已經掛上3號風球，所以我哋要趕喺8號風球前散席，估計就算未到美點雙輝，應該都會被散席，呢個狀況新人都好明白。或者成晚裏面，無論賓客、工作人員、侍應、我⋯相信新人同長輩s，大家內心都好焦急，有著同一句不敢講出口嘅說話「完咗咋咋淋走呀」。

結果成晚節奏好快，上菜快，影相快，散席固之然快，10點多啲就散席，最犀利係原定流程內嘅嘢都做齊，無因為趕而換少套衫，亦無因為趕而唔帶金器，需知道呢兩樣都幾花時間，之後照樣敬酒、大合照、同做埋surprise，講到好似好老定咁，其實全程我助手都Mon住個風，我一直update新人同向來賓廣播，每一part都即時傾做定唔做，最後幸運地，新人都返到屋企先打8號。我訓醒之後已經變天，好彩早一日擺酒，否則⋯

而家講返轉頭當然輕鬆簡單得多，但當時新人面對呢個情況，一定影響心情，作為一個MC處理完情感，都要同佢哋一齊傾下有咩處理？

-問返8號風球下各工作人員會唔會到？要唔要加錢？包括交通費

-如果早上掛咗8號兄弟姊妹需唔需要到，還是自己家人做啲簡單儀式？

-橫風橫雨下，4大長老嘅安全問題，會唔會只到晚宴一個地點？

-晚宴場地喺8號風球下有咩措施？

-俾新人知道晚宴時，可能食食下就掛8號，到時新人服裝轉做一套到尾，大家食少少嘢，影埋相先，方便客人趕車
................

 

當然都仲有好多嘢要諗定唔同方案～同樣地，面對疫情都係不能掌握嘅事，但舒緩情緒後，新人兩方不妨傾下plan B，當變化情況係計劃當中，即時都唔會太大反應，可能亦會預知之後情況，雖然到時唔一定係預期當中，但至少知道大家嘅方向係點，唔會方寸大亂。